Күһүҥҥү бырааһынньык
Оскуолабытыгар үгэс быһыытынан ыытыллар Күһүҥҥү бырааһынньыкка тэрээһиннээхтик бэлэмнэнэн кытынныбыт. Ол курдук “Авангарднай муода” күрэҕэр 2 миэстэ, айылҕа матырыйаалларыттан оҥоһуктары оҥорууга эмиэ 2 миэстэ буоллубут. Кылааспыт асчыт уола Эрчим Николаев “Оригинальнай бүлүүдэ” куонкуруска 1 миэстэ буолла. Кини бисквит тиэстэтиттэн ыаҕайалаах отону оҥорон бастаата. Аны “Осенняя поэзия” түһүмэххэ Эрчим хоһоон ааҕан 2 миэстэ буолла.
Ветеран учууталлыын көрсүһүү
Аҕам саастаахтар декадаларын чэрчитинэн, РСФСР оскуолатын үтүөлээх учууталын, педагогическай үлэ ветеранынНеустроева Прасковья Семеновнаны кытта көрсүһүү тэрийдибит.
Кини биһиэхэ сэрии кэмин оҕолорун олохторун, оонньоммотох оҕо саас туһунан олус интэриэһинэйдик кэпсээтэ. Эбэлэрбит, эһэлэрбит үлэлээн, олорон ааспыт олохторун биллибит. Көрсүһүү бүтэһигэр ыалдьыппыт бэйэтин баҕа санааларын эттэ.
Кылааспыт бастыҥ үөрэнээччитэ Ларионов Баир улууска ыытыллыбыт “Чтение вслух” диэн куонкуруска кыттан кэллэ.
“Уол оҕо кэскилбит, эр киһи эрэлбит” нэһилиэк иһинэн үлэлиир программа чэрчитинэн, уол оҕо күнүн көрсө, нэһилиэк спортка инструктора Ноговицына Нонна Николаевна алын сүһүөх уолаттарын кытта кылаас чааһыгар көрсүстэ. Күрэх балаһыанньатын билиһиннэрдэ, үчүгэйдик бэлэмнэнэллэригэр сүбэлээтэ.
Сэтинньи 7 күнүгэр, Филипп Лобанов аатынан орто оскуолаҕа, улуус 3-4 кылааһын үөрэнээччилэригэр “Смотр песни и строя” күрэххэ кыттыыны ыллыбыт. Күрэххэ барыта 13 команда кытынна. Биһигини ОБЖ учуутала Борис Сергеевич Яковлев салайан илдьэ сырытта. Инникитин үчүгэйдик бэлэмнэнэн, ситиһиилээхтик кыттыахпыт дии санаатыбыт.
Сэтинньи 14 күнүгэр Е.А.Шишигин аатынан Сатаҕай орто оскуолатыгар Социалистическай үлэ геройа, сылгыһыт Т.С.Лукин аатынан үгэс буолбут ааҕыыларга, алын кылаас уолаттарыгар “Аман өс” күрэҕэр Николаев Эрчим, герой хос сиэннэрэ Сеня, Степа Степановтар ситиһиилээхтик кыттан кэллилэр. Ол курдук Эрчим Николаев 2 миэстэ, Степа Степанов 3 миэстэ буолан үөрэн – көтөн кэллилэр.
Байанай нэдиэлэтигэр кылаастар икки ардыларыгар истиэнэ хаһыатын оҥоруу күрэҕэр кытынныбыт, “Баай Байанай бэлэҕэ” диэн ааттаах хаһыат оҥордубут. Хаһыаппытыгар аҕаларбытын кытта булка сылдьан түспүт хаартыскаларбытын тистибит.
Уолаттарга Байанай күрэҕэ бэрт үчүгэйдик ааста. Күрэҕи Г.Д.Захаров, Д.А.Тимофеев, Б.С.Яковлев, О.О.Лукин бэрт интэриэһинэйдик толкуйдаан ыыттылар. Хамаанданан квест оонньууну оонньоотубут уонна эстафеталастыбыт. Кыайан – хотон, бириискэ тиксэн тарҕастыбыт.